यो वर्षको तिहारमा ३७ करोड बराबरको फूल कारोबार हुने अनुमान

विगतका वर्षहरुको तुलनामा यस वर्ष सयपत्री फूलको माग उल्लेखरुपमा बढेको छ । फ्लोरिकल्चर एसोसिएसन नेपालका अनुसार अघिल्लो वर्ष तिहारमा करिब ३५ लाख व्यावसायिक सयपत्री फूलको खपत भएको थियो भने यस वर्ष ४० लाख भन्दा बढी माला खपत हुने अपेक्षा गरिएको छ ।
असोज ११ र १२ गतेको अविरल वर्षाका कारण यो वर्ष सयपत्री बालीमा धेरै क्षति पु¥याएको हुँदा आन्तरिक आपूर्तिमा कमी आएको छ । यो वर्ष सयपत्री फूलको माला ४० लाख, मखमली माला चार लाख ७५ हजार, गोदावरी २० हजार र मिक्स माला ३० हजार गरी जम्मा ४५ लाख २५ हजार व्यावसायिक रूपमा खेती गरिएको फूलको माला खपत हुने अनुमान गरिएको छ । यो तथ्याँक घरायसी प्रयोजनका लागि गरिएको खेतीको गणना गरिएको छैन ।
फ्लोरिकल्चर एसोसिएसन नेपालका अनुसार यो वर्ष ३७ करोड १८ लाख बराबर फूलको कारोबार हुनेछ । अघिल्लो वर्ष तिहारमा २७ करोड ४६ लाख बराबरको फूल कारोबार भएको थियो ।