दाना लाग्ने समयमा धानको बालामा मरुवा रोगले आक्रमण गर्दा चितवनमा धान उत्पादन घट्ने भएको छ । कृषि विकास कार्यालय चितवनका प्रमुख झलकनाथ कँडेलका अनुसार जिल्लामा ५० प्रतिशत धान काटिसक्दा उत्पादन घट्ने अनुमान गरिएको हो । छिटो धान रोपिने पूर्वी चितवनमा धान भित्रयाउने क्रममा अध्ययन गर्दा यस्तो पाइएको उहाँले जानकारी दिनुभयो । यस अघिपानी र मौसम अनुकूल भएका कारण प्रतिहेक्टर ४.२ मेट्रिक टन उत्पादन हुने अनुमान गरिएकोमा अहिले ३.९ मेट्रिक टन मात्र उत्पादन हुने अनुमान गरिएको हो ।
स्मरणरहोस गत वर्ष २६ हजार ३५२ हेक्टर क्षेत्रफलमा धान खेती गरिएकोमा एक लाख १२ हजार १९० मेट्रिक टन उत्पादन भएको थियो ।
धान हुने स्थानमा घर निर्माण, अन्य खेती, बाटो, विकास निर्माणका कामले गर्दा धान रोप्ने क्षेत्रफल हरेक वर्ष घट्दै गएको छ । पूर्वी चितवनको खैरहनी, राप्ती र रत्ननगर नगरपालिकाको दक्षिण क्षेत्र धानको पकेट क्षेत्र मानिएको छ । पश्चिम चितवनको मेघौली, गुञ्जानगर, माडी, गीतानगर धानको पकेट क्षेत्र हुन् ।
चितवनमा धान उत्पादन घट्ने
