भारतबाट गहुँ आयात गर्न ५८ कम्पनीको आवेदन

भारतबाट गहुँ आयात गर्नको लागि नीजि क्षेत्रका ५८ वटा कम्पनीले आवेदन दिएका छन् । वाणिज्य आपूर्ति तथा उपभोक्ता संरक्षण विभागले माघ १४ मा चुक्ता पुँजी कम्तीमा १ करोड रुपैयाँ बराबर भएका कम्पनीहरुलाई गहुँ आयातको लागि आवेदन दिन आव्हान गरेको थियो ।
सरकारले भारतबाट २ लाख टन आयात गर्ने निर्णय गरेकोमा विभागलाई ९० हजार टन आयात गर्ने अधिकार दिइएको छ । १ लाख टन उद्योग विभाग र १० हजार टन साल्ट ट्रेडिङले आयात गर्ने जनाइएको छ । छनौटमा परेका कम्पनीहरुले भारतको नेसनल कोअपरेटिभ एक्स्पोट्र्स लिमिटेडलाई अग्रिम पैसा बुझाए पछि बल्ल ढुवानी गरिदिने गरि सरकारले भारत सरकारसंग सम्झौता गरेको छ ।
विभागले छनौटमा पर्ने कम्पनीहरुले न्यूनतम १ सय टन र बढीमा १० हजार टनसम्म गहुँ आयात गर्न पाउने गरि व्यवस्था गर्दैछ ।
कोटा प्राप्त भएपछि ३ महिनाभित्र गहुँ आयात गरिसक्नुपर्ने विभागले जारी गरेको सूचनामा उल्लेख छ । भारतले २०७० वैशाखमा गहुँ निर्यातमा रोक लगाएको थियो । रुस–युक्रेन लडाईलाई कारण देखाउंदै भारतले निर्यात रोकेपछि नेपालमा त्यसको ठूलो असर परेको थियो । गहुँको मूल्य आकासिएको थियो । त्यहीकारण सरकारको विशेष अनुरोधमा भारतले केही महिना अघि २ लाख टन गहुँ नेपाललाई विक्री गर्न सहमती जनाएको थियो । त्यही अनुसार अहिले गहुँ ल्याउने प्रकृया शुरु भएको हो ।