गत वर्षातको पानीको कारण डुबान परेर धान स्याहार्न नपाएका किसानले सरकारसंग क्षतिपूर्ती माग गरेका छन् । क्षतिपूर्ती नपाए आन्दोलनमा उत्रने चेतावनी उनीहरुले दिएका छन् ।
पर्साको वीरगञ्ज नगरपालिकाको वडा नं १७, २४, २५ र २६ का बासिन्दाले पानीको उचित निकास नहुँदा धान डुवानमा परेकाले पाकेको धानसमेत भित्रयाउन नपाएको भन्दै क्षतिपूर्ति माग गरेका हुन् । ती वडाका श्रीसिया, सुगौली, आठराहा, बहुअरी र आली आदी क्षेत्रमा मात्रै २०० विगाहा खेतको धानवाली वर्षातको डुबानका कारण नष्ट भएको भन्दै किसानले जिल्ला प्रशासन कार्यालयमा क्षतिपूर्ति माग गर्दै पत्र दर्ता गराएका हुन् ।
माग पत्रमा त्यति बेलाको पानी अहिलेसम्म नसुकेको र अहिले गहुँ खेतीसमेत गर्न नपाएको किसानले बताएका छन् । कतिपय खेतमा अहिले पनि पानी जमेको छ । खेतको चारैतिर सडक बनाइएको तर पानी निकासका लागि नाला निर्माण नगरिएकोले आफूहरुको खेत डुबानमा परेको किसानको भनाइ छ । करीब एक किलोमिटर जति नाला निर्माण भएमा तत्कालका लागि पानीको निकास हुन सक्ने भए पनि सरोकारका निकायले चासो नदेखाएको स्थानीय किसानको आरोप छ ।
सरकारले पानीको निकासमा चासो नदिंदा आफूहरुलेले क्षति बेहोर्नुपरेको गुनासो किसानको छ । किसानको माग पत्र बुझेपछि प्रमुख जिल्ला अधिकारी गणेश अर्यालले आगामी वर्खामा डुवान नहुने गरी निकासको व्यवस्था मिलाउन पहल भैरहेको जानकारी दिए । साथै उनले पीडित किसानलाई राहत उपलब्ध गराउन आफूले संघिय र प्रदेश सरकारको साथै स्थानीय तहसंग पनि पहल गर्ने बताए ।
गत मंगलवार बसेको जिल्लास्तरीय विपद् व्यवस्थापन समितिको बैठकले किसानको समस्या समाधानमा पहल गर्ने निर्णय गरेको छ ।
