यसपालि तिहारमा ४० करोड रुपियाँ बराबरको स्वदेशी माला बिक्री भएका छन् । प्रत्येक वर्ष तिहारमा आयातित मालाले बजार धान्ने गरेकामा यसपालि भने अधिकाँश स्वदेशी फूल र मालाले बजारको माग धानेको छ ।
फ्लोरिकल्चर एसोसिएसन अफ नेपाल (फ्यान) का अनुसार तिहारमा ३५ लाख सयपत्री, पाँच लाख मखमली र गोदावरीको माला खपत भएको छ । भारतबाट आउने फूल र मालामा कडाई गरिएकोले यस वर्ष नेपाली किसानले उचित मूल्य पाएका छन् ।
विगतका वर्षहरुमा तिहारमा ठुलो परिमाणमा भारतीय सयपत्री माला आयात हुँदा स्वदेशी उत्पादनले मूल्य नपाई किसानले खेर फाल्नुपरेको थियो । गैरकानुनी ढङ्गबाट भित्रिएका माला नष्ट गरिएकाले पनि बजारमा बिक्री हुन नपाएको र त्यसले गर्दा पनि स्वदेशी उत्पादनले राम्रो मूल्य पाएको व्यवसायीहरुको भनाइ छ ।
तिहारमा काठमाण्ठौ उपत्यकासँगै आसपासका जिल्ला काभ्रे, धादिङ, नुवाकोट,रामेछाप,सिन्धुलीलगायतका जिल्लाबाट फूल भित्रिएको थियो । स्मरणरहोस् नेपालका ५२ जिल्लामा २६० हेक्टर क्षेत्रफलमा पुष्प व्यवसाय भइरहेको छ भने आठ अर्ब रुपियाँभन्दा बढी लगानी र ५० हजार जनाले प्रत्यक्ष रूपमा रोजगारी पाएका छन् ।
तिहारमा चालिस करोडको फूलमालाको कारोबार
