अण्डाको माग बढ्यो, मूल्य बढाइयो, उत्पादन घटाइयो

साउनमा व्रत बस्ने र चोखो खाने धार्मिक मान्यताका कारण घटेको अण्डाको माग भदौ लागेसँगै बढेको छ । त्योसंगै अण्डा उत्पादकहरुले मूल्य बढाएका छन् । तर उत्पादन भने घटाइएको छ । झण्डै दुई महीना अघि २५ देखि २६ लाख दैनिक अण्डा उत्पादन हुँदै आएकोमा अहिले घटेर २३ देखि २४ लाखमा झरेको छ । माग बढेसंगै फेरि उत्पादन बढ्ने विश्वास गरिएको छ ।
अण्डा उत्पादक संघका अध्यक्ष तथा दाउन्ने एग्रो फार्म लिमिटेडका कार्यकारी निर्देशक विनोद पोखरेलका अनुसार दाउन्ने एग्रो फार्मले चितवनलाई आधार बनाएर एक्सल अण्डा प्रतिक्रेट रु पाँच सय पाँच, ठूलो अण्डा रु चार सय ९५ र मध्यम अण्डाको मूल्य रु चार सय २५ तोकेको छ । अन्य अण्डा उत्पादकहरुले पनि लगभग त्यही मूल्य कायम गरेका छन् ।