संस्थागतरुपमा कुरा गर्दा पशु चिकित्सा परिषद आफैमा सानो संस्था हो भन्दा फरक पर्दैन । देशभरका पशु चिकित्सकहरुको संस्था भए पनि अरु संस्थामा देखिने तडकभडकको तुलनामा यो संस्था ‘नेपथ्य’मा देखिन्छ । जस्को बारेमा स्वंय त्यही संस्थामा जोडिएका र बाहिरका २,४ जना बाहेक धेरैलाई थाहा छैन ।
तर, त्यही संस्थाले गत शनिबार भएको चुनावमा एउटा गतिलो कामको ‘बीउ’ रोप्यो । यस्तो बीउ जो आजको दिनमा लोकतान्त्रिक शासन व्यवस्थाको वकालत गर्नेहरुको लागि ‘ऐना’ मात्र होइन, भविश्यको लागि मार्गदर्शन पनि हो ।
तर, यो निर्वाचनले दिएको त्यति महत्वपूर्ण सन्देशको बारेमा स्वंय पशुचिकित्सकहरुले नै कति मेसो पाउन सकिरहेका छन् ? यो भने स्वंय उनीहरुलाई नै थाहा होला ।
नेपालमा गुटगत निर्वाचन हुन थालेका धेरै भयो । पंचायतकालमा पनि भितर र इतर वा चन्द र थापा पक्षको नाममा चुनावमा भोट मागिन्थ्यो, बहुदल र पछि गणतन्त्र आएपछि त यो प्रवृत्ति यति हावि भैरहेको छ कि त्यसले सिंगो समाजलाई नै विषाक्त बनाएको छ । टोल सुधार समितिदेखि विद्यालयको संचालक समितिसम्म, डाक्टर—इन्जिनियरको संस्थादेखि वकिलहरुको संस्थासम्म चुर्लुम्मै गुटमा गुटमुटू भएको छ । संस्थागत निर्णयको नाममा गुटको निर्णय लाद्ने प्रवृत्ति यति हावी छ कि त्यसले समाजमा ल्याएको विखण्डनको हिसाब किताब समेत गर्न सकिदैन ।
यस्तो अवस्थामा भएको पशु चिकित्सा परिषद्को उपाध्यक्ष र सदस्य पदहरुको निर्वाचनमा त्यसको गन्ध आउने आंशका गरिएको थियो । केही केही व्यक्तिहरुले त्यस्तो प्रयास नगरेका पनि होइनन् । तर, उनीहरु सफल भएनन् ।
परिणाम ! चुनावमा एजेण्डाले महत्व पायो । आफ्नो एजेण्डा राम्रोसंग मतदाता बुझाउन सक्नेहरुले चुनाव जिते, नसक्नेहरुले हारे । न भोट माग्नेले बुढानिलकण्ठका ‘दाई’, बालकोटे ‘बा’, ‘नानीका बा’ वा चितवनतिर ‘भौमान’को नाममा भोट मागे, न त दिनेहरुले नै ‘गुटका डमी उम्मेद्वार’लाई भोट दिनु पर्यो । ‘खसोखास ओरजिनल’ अनुहारलाई जिताए र त्यस्तैलाई हराए ।
जे भए पनि आजको दिनमा नेपालमा नौलो खालको चुनाव गरेर लोकतन्त्रको त्यस्तो परिपाटी बसाए, जो अपवादमा वाहेक हरेक नेपालीले चाहान्छ ।
जे भयो अति राम्रो भयो, त्यसमा उपाध्यक्ष दुई मध्ये एक महिला र सदस्यहरुमा दलित र मधेसी अनुहार पनि थपिन पाएको भए त्यो कति सुन्दर हुने थियो होला ?
स्मरणरहोस् परिषदको उपाध्यक्ष पदमा डा. मनोज कुमार शाही र डा. जगदीश पाण्डेय विजयी हुनुभयो भने डा. रेवन्त भट्टराई र डा. सितलकाजी श्रेष्ठ पराजित हुनुभयो ।
त्यस्तै सदस्यमा डा. इन्दिरा शर्मा, डा.क्षितिज पौडेल, डा. शुशील कुमार पौडेल, डा. शंसी इंगोल र डा. दीपक तिवारी निर्वाचित हुनु भयो ।
डा. देवजीत प्रसाद ठाकुर, डा. प्रकाश कुमार यादव, डा. प्रवेश शर्मा, डा. बाल कुमार श्रेष्ठ, डा. महेश ठाकुर, डा. महेश प्रसाद श्रीवास्तव, डा. राम नन्दन तिवारी, डा. शुवास पौडेल र डा. नारायण न्यौपाने पराजित हुनुभयो ।
नेपाल पशु चिकित्सा परिषद २०५५ सालमा स्थापना भएको सरकारी निकाय हो, जसले भेटेरिनरी चिकित्सकहरूको दर्ता, नियमन, र व्यावसायिक मान्यता प्रदान गर्दै आएको छ।
निर्वाचनमा कुल ९८८ मतदाता सहभागी भएका थिए।
