पेरिस ओलम्पिकमा स्वर्ण पदक जितेका पाकिस्तअनी ज्याभ्लिन थ्रो खेलाडी अर्सद नदिमलाई ससुराले भैँसी उपहार दिएको घटना अहिले विश्वव्यापी चर्चाको विषय बनेको छ । ओलम्पिक सकिएको कैंयौ दिन भइसक्दा पनि यो घटना सेलाएको छैन । यसबारेमा विश्वव्यापीरुपमै अनेक ‘मिम’हरु बनेका छन् । सामाजिक संजालहरु रंगिएका छन् र लेख तथा समाचार टिप्पणीहरु आइरहेका छन् ।
र, संगसंगै एउटा प्रश्न पनि उठिरहेको छ, कसैले कसैलाई भैंसी उपहार दिनु सम्मानको प्रतिक हो कि बेइज्जतको ?
नदिमले भारतीय खेलाडीलाई पछाडि पार्दै ओलम्पिक कीर्तिमानसहित स्वर्ण पदक जितेका थिए । ओलम्पिकमा पाकिस्तानले व्यक्तिगत स्पर्धामा पहिलोपटक स्वर्ण पदक जितेको हो ।
नदिम पन्जाबस्थित खानेवालमा आमाबुबा र दाजुभाईसहित बस्दै आएका नदिमका दुई छोरा र एक छोरी छन् । अर्सदका ससुरा मोहम्मद नवाजले भैँसीलाई आफ्नो ग्रामीण समाजमा हार्दिक उपहार र सम्मानका रुपमा लिइने बताए । उनले भैँसीलाई मूल्यवान र सम्मानित मानिने बताए ।
अर्सद गाउँमै हुर्किएकाले भैँसी उपहार उनका लागि अझ अर्थपूर्ण भएको उल्लेख गरे । उनले एउटा खेलाडी जीवनभर खेल्न सक्दैन, त्यसको लागि उद्यम गर्नुपर्छ भन्ने सन्देश प्रवाह गर्नको लागि आफूले भैंसी उपहार दिएको पनि स्पष्ट पारेका छन् ।
यो घटनालाई खासगरि भारतिय संचारमाध्यम र सामाजिक संजालका प्रयोगकर्ताहरुले भने पाकिस्तानको राजनीतिसंग जोडेर बेइजजत गर्ने प्रयास गरिरहेका छन् । उनीहरुले पाकिस्तानले आफ्ना खेलाडीको बेइजजत गरेको भन्दै भारत र पाकिस्तानका खेलाडीले पाउने मानसम्मान, प्रतिष्ठा र आर्थिक हैसियतको तुलना गरिरहेका छन् । निश्चितरुपमा भारतीय खेलाडीले जुन सेवा सुविधा पाउंछन्, त्यो पाकिस्तानी खेलाडीले मात्र होइन दक्षिण एशियाका कुनै पनि देशका खेलाडीले पाउंदैनन् । त्यसको अर्थ ती देशमा खेलाडीको अवस्था विजोक छ, मान सम्मान नै पाउंदैनन् भन्ने होइन । त्यसमा कुनै जीतको अवसरमा कसैले केही उपहार दिन्छ भने त्यो बेइज्जत होइन, गर्वको विषय हो । किनकी उपहारको कुनै मूल्य हुँदैन, त्यो अमूल्य हुन्छ । तर, भारतीय संचारमाध्यम र सामाजिक संजालका प्रयोगकर्ताहरुको शैली हेर्दा लाग्छ, उनीहरु आफ्नो सबैभन्दा पुरानो र सबैभन्दा ठूलो दुस्मन मानिने पाकिस्तानी खेलाडीले आफ्नो देशका खेलाडीलाई पराजित गरेर स्वर्ण पदक जितेको कुरा स्विकार गर्न सकिरहेका छैनन् ।
