थारू समुदायको वाहुल्यता रहेको लुम्बिनी प्रदेशमा माघी पर्वको लागि व्यापक तयारी शुरु भएको छ । खागसगरि प्रदेशका तराईका जिल्लाहरु रुपन्देही, कपिलवस्तु, बाँके र बर्दियामा तीन दिनसम्म मनाउने गरि तयारी शुरु गरिएको हो ।
खिचडी पर्व समेत भनिने माघीको अवसरमा रुपन्देहीको सैनामैनामा खिचडी महोत्सवको आयोजना गरिदैंछ ।
थारु कल्याणकारी सभा सैनामैना रुपन्देहीले आयोजना गरेको महोत्सवलाई आकर्षक बनाउन थारू समुदायको लोकप्रिय झुमडा, झर्रा, सोरठी, बडका तथा लाठी नाच प्रदर्शन गरिने भएको छ भने थारू समुदायको मौलिक एवं परम्परागत खानाका रूपमा रहेको घोगी, अनदीको भुजा, कछुवाको मासु, पतुसनी, ढिकरी, माछाका परिकार र रोटी लगायतका परिकार पनि राखिने भएको छ ।
कार्यक्रमको अवसरमा थारू समुदायको लोकप्रिय नाच प्रदर्शनको साथै निबन्ध प्रतियोगिता र विभिन्न खेलकुद प्रतियोगिता पनि आयोजना गरिएको छ ।
माघी महोत्सवको पूर्व सन्ध्यामा थारू कल्याणकारी सभा सैनामैनाले थारू समाजको वर्तमान अवस्था र अधिकार प्राप्तिका विकल्पहरू विषयक अन्तरक्रिया समेत गरेको छ ।
सैनामैनामा आयोजित उक्त अन्तरक्रिया कार्यक्रममा बोल्दै थारू कल्याणकारी सभाका केन्द्रिय पार्षद रामबली चौधरीले थारू समुदायको भाषा संस्कृति, रहनसहन, खानपान, गीत सङ्गीत लोप हुने अवस्थामा पुगेकोले यसको संरक्षणका लागि सबै थारू समुदायले पहल गर्नुपर्ने आवश्यकतामा जोड दिनुभयो ।
कार्यक्रममा थारू कल्याणकारी रुपन्देहीका उपाध्यक्ष बुद्धिराम थारूले थारू जातिको मौलिक संस्कार र संस्कृति अरू कसैले होइन आफैले जोगाउनु पर्ने भन्दै नयाँ पुस्ताले पुरानो पुस्ताको कला र सीप अनुसरण गर्नुपर्नेमा जोड दिनुभयो । उहाँले प्रविधिको विकासले गर्दा थारू समुदायको कतिपय संस्कृति लोप हुन लागेको भन्दै संरक्षणका लागि सबै एकजुट हुनुपर्ने आवश्यकता औंल्याउनुभयो । थारू कल्याणकारी सभा सैनामैनाका अध्यक्ष दुलबहादुर चौधरीको अध्यक्षतामा कार्यक्रम भएको थियो ।
