आज विहान गएको भूकम्पको क्षतिको विवरण आउंदैछ । विहान ११ बजेसम्म प्राप्त विवरणहरुबाट जुन तीब्रता स्केलको भूकम्प गयो, त्यस अनुसारको धनजनको क्षति भएको देखिदैन । त्यसको मुख्य कारण जाडोयामलाई मानिएको छ ।
७.१ तिब्रताको भूकम्पको केन्द्रविन्दु शिगात्से र आसपासमा अहिले निकै चिसो छ । भूकम्पबाट बढी प्रभाव परेको नेपालको हिमाली क्षेत्रमा पनि अत्यधिक चिसो छ र त्यहीकारण हिमतालहरु जमेका छन् । हिम नदीहरुमा पानीको वहाव कम छ । भूकम्प प्रभावित सोलोखुम्बुको खुम्बु पासाङ गाउँपालिका वडा नम्बर ४ का अध्यक्ष लक्ष्मण अधिकारीले भूकम्पले बेसरी हल्लाए पनि क्षति भएको छैन । स्थानीय ठूल्ठूला बस्तीहरू भएका खुम्जुङ, खुम्जे, ताङबोचे, फोर्चे, बिङबोचे, गोक्यो, थामे, नाम्चेबजार, फराकक्षेत्र, लुक्ला बजार, खरीखोला कतै पनि क्षति भएको जानकारी अहिलेसम्म आएको छैन ।
उनका अनुसार ठूला तालहरू गोक्यो ताल र इम्जा ताल जमेकोले क्षति हुन नपाएको हो । गर्मी वा मनसुनको मौसम भएको भए भूकम्पको कारण हिमताल फुटेर ठूलो क्षति हुन सक्ने संभावना थियो ।
भूकम्पपछि शक्तिशाली परकम्पहरू गइरहेका छन् । चिनियाँ सेनाले उद्धार प्रयास सुरु गरेको छ र मानवरहित ड्रोनलाई सगरमाथानजिकैको दुर्गम क्षेत्रमा परिचालित गरेको चिनियाँ संचारमाध्यमहरुले उल्लेख गरेका छन् ।
भूकम्पको केन्द्रविन्दु सिगात्सेबाट ४०० किलोमिटर टाढारहेको काठमाण्डौ लगायतका नेपालका वाग्मती, मधेश र कोशी प्रदेशका जिल्लाहरुको साथै भारतको उत्तरप्रदेश र विहार तथा भुटानमा समेत महसुस गरिएको थियो । पर अवस्थित नेपालको राजधानी काठमाण्डूमा पनि महसुस गरिएको थियो ।
नेपाली समयानुसार बिहान ६.५० तिर उक्त भूकम्पको धक्का महसुस गरिएको थियो । त्यसपछि पनि नेपालको लोबुचे क्षेत्रभन्दा उत्तर पूर्वमा पर्ने चिनियाँ भूमिलाई केन्द्रबिन्दु बनाएर आधा दर्जन भन्दा बढी पराकम्पहरू गैसकेको छ ।
स्मरणरहोस् दक्षिण पश्चिम चीनमा बारम्बार भूकम्प जाने गर्छ । सन् २००८ मा सिचुआन प्रान्तमा गएको भूकम्पका कारण करिब ७० हजार जनाको मृत्यु भएको थियो । चीनको सरकारी टेलिभिजन सीसीटीभीका अनुसार आजको भूकम्पअघि सिगात्से वरपर पनि साना ठूला दर्जनौं भूकम्पहरु गएका थिए ।
