माओवादी शान्ति प्रक्रियामा आएपछि व्यवसायिकरुपमै भएको रक्तचन्दन तस्करी केही वर्षयता ठप्प भए पनि यसमा संलग्नहरुले फेरि कारोबार थालेको प्रहरीले निष्कर्ष निकालेको छ ।
यसै साता ४ क्वीन्टलभन्दा बढी रक्तचन्दनसहित सहित काठमाडौंको पेप्सीकोलाबाट प्रहरीले दुई जनालाई नियन्त्रणमा लिएको थियो । उनीहरुसँगको प्रारम्भिक बयानमा राजनीतिक नेतृत्वकै साथमा फेरि रक्तचन्दनको तस्करी चलिरहेको खुलेको हो ।
गत मंगलबार साँझ काठमाडौं महानगरपालिका वडा नम्बर १४ का ४१ वर्षीय रमेश थापा र सिन्धुपाल्चोक घर भई पेप्सीकोला बस्दै आएका ४० वर्षीय ज्ञानबहादुर तिमल्सिनालाई प्रहरीले पक्राउ गरेको थियो । तिमल्सिना सिन्धुपाल्चोकका माओवादी नेता हुन् ।
शान्ति प्रक्रियापछि माओवादी आबद्ध वाइसिएल र क्यान्टोनमेन्टमा रहेका लडाकु कमाण्डरहरुले सिन्धुपाल्चोक नाकाबाट अर्बौका रक्तचन्दन तस्करी गरेका थिए। पछि माओवादीकै नेता मात्रिका यादव मन्त्री भएका बेला उनले रोक्न खोज्दा सिन्धुपाल्चोकमै उनीमाथि आक्रमण प्रयास समेत भएको थियो ।
पछिल्लो दशक रक्तचन्दन तस्करी रोकिएकोमा यसपटक ठूलो मात्रामा रक्तचन्दनसहित माओवादी नेता पक्राउ परेपछि प्रहरीले केही नयाँ तथ्य फेल पारेको छ । यद्यपी यसको विस्तृत अनुसन्धान बाँकी रहेको प्रहरीले जनाएको छ ।
रक्तचन्दन कारोबार गरिरहेको सूचनाका आधारमा उनीहरूलाई नियन्त्रणमा लिइएको काठमाडौं उपत्यका अपराध अनुसन्धान कार्यालयका एसपी काजी आचार्यले बताए। उनीहरूको साथबाट ४ सय ६२ किलो रक्तचन्दन फेला परेको थियो । बोरा र डोरी छुट्याएर जोख्दा ४ सय ३२ किलो रक्तचन्दन देखिएको एसपी आचार्यले बताए ।
उनीहरूले भारतबाट रक्तचन्दन ल्याएर तिमल्सिनाको कोठामा राखेका थिए। तिमल्सिना भने पेप्सीकोलामा कोठा भाडामा बस्दै आएका थिए। प्रहरीको प्रारम्भिक अनुसन्धानबाट भने उनीहरूले केही महिना अगाडि नै रक्तचन्दन ल्याएको र अर्को व्यक्तिलाई बुझाउने तयारी गरिरहेका थिए ।
पक्राउ परेका ज्ञान बहादुर तिमिल्सिना सिन्धुपाल्चोक बलेफि गाउँपालिका वडा नम्बर ८ का स्थानीय हुन। भूकम्प अगाडि उनले तातोपानी नाकाबाट झोलापोकामा सामग्री ल्याएर बिक्री गर्ने गरेका थिए ।
माओवादी पार्टीको राजनीतिसँगै बाह्रबिसेमा सामान्य होटल समेत सन्चालन गरेका तिमिल्सिना कोरोनापछि मास्क ब्यापारमा जोडिएको थिए । उनले तिनकुने आसपासमा स्पा समेत सन्चालन गरेका थिए । हाल उनी माओवादी सिन्धु सम्पर्क समितिका सदस्य रहेको बताइएको छ ।
नेपाल प्रेसबाट
