राप्तीसोनारीमा दुई करोडभन्दा बढी माछाका भुरा उत्पादन

बाँकेको राप्तीसोनारी गाउँपालिका–८ शम्शेरगञ्जस्थित मत्स्य विकास केन्द्रले वार्षिक दुई करोडभन्दा बढी माछाका भुरा उत्पादन गर्दै आएको छ ।
केन्द्रले ग्रास कार्प, सिल्भर, विगहेड कार्प, भाकुर, रहु तथा नैनी, कमन कार्प प्रजातिका माछाका भुरा उत्पादन गर्दै आएको छ ।
आर्थिक वर्ष २०८०÷८१ मा ‘ह्याचलिङ’ भुरा दुई करोड, ‘फ्राई’ भुरा १५ लाख, ‘फिङ्गरलिङ्ग’ भुरा १२ लाख र खानेमाछा (इएरलिङ्ग) तीन क्विन्टल उत्पादन गर्ने वार्षिक लक्ष्य राखिएको थियो । तर लक्ष्यभन्दा धेरै उत्पादन गरिएको केन्द्रले जानकारी दिएको छ । भुरा र खानेमाछा बिक्रीबाट गत वर्ष ३३ लाख ८२ हजार ३९८ रुपियाँ राजस्व सङ्कलन भएको थियो ।
केन्द्रको कूल तीन दशमलव ५० हेक्टर जमिनमध्ये जलाशय जमिन एक दशमलव ८२ हेक्टरमा भुरा उत्पादनका लागि साना ठूला गरेर २३ पोखरी निर्माण गरिएको छ । त्यसमा रेयरिङ्ग पोखरी चार, नर्सरी पोखरी १२, माउ पोखरी ६ र खानेमाछा पोखरी एउटा छ ।
‘हरेक वर्ष लक्ष्यभन्दा धेरै उत्पादन गरिरहेका छौँ’ केन्द्रका सूचना अधिकारी केन्द्रका सूचना अधिकारी मत्स्य अधिकृत शालिकराम चौधरीले भन्नुभयो । उहाँका अनुसार त्यहाँ उत्पादित भुराले किसानको मागको आधारमा २५ देखि ३० प्रतिशत मात्र धानिएको छ ।