११ पटक म्याद थप हुँदा पनि चोभारको बजार निर्माण अझै अनिश्चित

१३ महिनामा काम सकेर संचालन गर्ने घोषणासहित निर्माण शुरु गरिएको काठमाडौंको चोभारको फलफूल र फूलको थोक तथा खुद्रा बजार निर्माण आठ वर्ष सकिँदा पनि अलपत्र छ । ११ पटकसम्म म्याद थपको सुविधा पाएर पनि काममा ढिलासुस्ती गरे पनि अझै कहिले निर्माण सकिन्छ भन्ने यकिन छैन ।
पछिल्लोपटक १३ चैत ०८० मा ११औँपटक म्याद थप गरिएको थियो । त्यतिबेला ०८१ भदौ मसान्तभित्र निर्माण सक्नुपर्ने सर्त थियो । तर, यो सर्त पनि ठेकेदार कम्पनीले काम नै नगरेपछि निर्माण कार्य अलपत्र परेको हो ।
निर्माण व्यवसायी महासंघका अध्यक्ष रवि सिंहको महादेव खिम्ती निर्माण सेवा, अनक कन्स्ट्रक्सन र बंगलादेशको साम्सोजामोन कन्स्ट्रक्सनले संयुक्त (जेभी) रूपमा ३५ करोडको यो ठेक्का ०७३ असोजमा काम शुरु गरेका थिए ।
काठमाण्डौ उपत्यकाको बढ्दो तरकारी फलफूलको मागलाई सहजरुपमा पूर्ती गर्न गर्न भन्दै कालीमाटी तरकारी तथा फलफूल बजारको केही हिस्सा चोभारमा सार्ने गरि काम शुरु गरिएको थियो । २२ रोपनी जग्गामा निर्माण गर्न शुरु गरिएको बजार १३ महिनामा संचालनमा ल्याउने भनिए पनि ठेकेदारले काम नगरेपछि आठ वर्ष पछि गत ३१ असोजमा कृषि तथा पशुपक्षी विकास मन्त्रालयले ठेक्का रद्द गरेको थियो । त्यसयता निर्माण कार्य पूर्णरुपमा रोकिएको छ । सर्वाेच्च अदालतले ठेक्का तोड्ने निर्णय कार्यान्वयन नगर्नू भन्ने आदेश दिएकाले अहिले निर्माण कार्य रोकिएको हो । तर, अब कसरी अगाडि बढाउने भन्नेमा मन्त्रालय नै अन्योलमा रहेको अधिकारीहरुले जानकारी दिएका छन् ।