गत असोज ११ र १२ गते परेको अविरल वर्षाले पुष्पखेतीमा १५ करोड रुपैंया बराबरको क्षति पुर्याएको छ भने मूल्य सृंखलापनि खल्बलिएको छ ।
किसान र व्यवसायीले तिहारलाई लक्षित गरेर उत्पादन र बजारीकरणको तयारी गरेका थिए, तर वर्षात्ले नोक्सानी गरेपछि त्यसको असर तिहारमा पर्ने भएको छ । नेपाली फूलले नपुग्ने भएपछि भारतबाट ल्याउनु पर्ने वाध्यता भएको छ भने मूल्य पनि बढ्ने भएको छ ।
गत वर्षको तिहारमा ३३ लाख माला खपत भएको थियो । यस वर्ष ४० लाख खपत हुने अनुमान गरिएको छ । स्वदेशी उत्पादन २५ लाख माला मात्र रहेकाले यस वर्षको तिहारमा १५ लाख सयपत्री माला भारतबाट आयात गर्न लागिएको हो ।
पुष्प व्यवसायी दिलीप बादेकाअनुसार वर्षाले गरेको नोक्सानीको कारण नेपाली फूलले बजार धान्न नसक्ने भएपछि तिहारमा भारतबाट १५ लाख माला आयात गरिदैंछ भने मूल्य पनि बढ्नेछ ।
गत वर्ष रु ६५ देखि ७० सम्म एउटा मालालाई परेको भए पनि यस वर्ष प्रतिगोटा रु ८० देखि ८५ सम्म होलसेल मूल्य पर्ने अवस्था छ ।
स्मरणरहोस् व्यावसायिक रूपमा चार सय ५० प्रजातिका फूल उत्पादन हुँदै आएको छ । यस व्यवसायबाट ४४ हजारभन्दा बढी व्यक्तिले प्रत्यक्ष अप्रत्यक्षरूपमा लाभ लिएका छन् । नेपालमा लगभग दुई सय २१ हेक्टर क्षेत्रफलमा एक हजार एक सय ८४ व्यवसायीले पुष्पखेती गरेका छन् ।
