भारतको महाराष्ट्र राज्यको बुलढाणा जिल्लाका शेगावँ, तालुका, पहुरजिरा गाउँका १२ वटा गाउँका किसानहरुमा फैलिएको कपाल झर्ने महामारी नियन्त्रण हुन सकेको छैन । पहिले कल्यिै नदेखिएको र नसुनिएको यो महामारीबाट चिकित्सकहरु र अनुसन्धानकर्ताहरु पनि आश्चर्यमा परेका छन् ।
पीडित किसानहरुका अनुसार कपाल झर्न शुरु गर्नु अगाडि टाउको एकदमै चिलाउँछ र त्यसपछि असाध्यै छिटो झर्छ । कपाल झरिसकेपछि केही मानिसको टाउकोमा फेरि आाफै कपाल उम्रिएको छ, तर धेरैको कपाल उम्रिएको छैन् ।
केही समय पहिलेदेखि नै यो समस्या देखि पनि नयाँ वर्ष सन् २०२५ शुरु भएदेखि यो समस्या अचाक्ली बढेको छ । स्थानीय सरकारी अधिकारीहरुका अनुसार सन् २०२५ शुरु भए यता मात्रै २०० जना भन्दा बढी मानिसहरूको कपाल आफै झरेको छ । कपाल झर्नेमा चार वर्षका बालकहरू देखि ७५,८० वर्षका वृद्धहरुसमेत छन् ।
समस्या बढ्दै गएपछि आत्तिएका किसानहरुले समस्याको कारण पत्ता लगाएर त्यसलाई रोक्न अनुरोध गरिरहेका छन् । सरकार मातहतको इन्डियन काउन्सिल अफ मेडिकल रिसर्च (आईसीएमआर) को नेतृत्वमा स्वास्थ्य अधिकारीहरु र अनुसन्धानकर्ताहरुले त्यसको कारण पत्ता लगाउने प्रयास गरे पनि सकेका छैनन् ।
उनीहरुले प्रभावित किसानको कपाल, नङ, रगत, पिसाब र स्थानीय पानीको स्रोत सङ्कलन गरेर अकोलास्थित सरकारी मेडिकल कलेजले विश्लेषण गराएका थिए थिए, तर अहिलेसम्म रहस्य खुलेको छैन ।
उक्त कलेजकी डीन डा. मिनाक्षी गज्बिएले बीबीसी न्यूज मराठीसँग बायोप्सी र रगतको परीक्षण हेर्दा यो फङ्गस सङ्क्रमणले भएको होइन भन्ने सङ्केत गरेको बताइन । उनका अनुसार यसको यकिन कारण के हो भनेर पत्ता लगाउन अनुसन्धान जारी छ। नुहाउन कस्ता सामाग्री प्रयोग गरिएको छ भन्नेदेखि पानीको स्रोतसम्मको अध्ययन गरिँदै छ।
अचानक कपाल झरेपछि केही मानिसका लागि त्यसले सामाजिक समस्याहरू निम्त्याएको छ । विवाहका लागि बोलाइएका भेटघाटका कार्यक्रम रद्दत गरिएको छ। कपाल झरेकाहरूलाई सामाजिक क्रियाकलापहरूबाट बहिष्कार गरिएको छ। केही विद्यार्थीहरूले विद्यालय र कलेजमा आफूहरूलाई जिस्काइएको भन्दै गुनासो गरेका छन्।
स्थानीयवासी ५५ वर्षे पार्वती (परिवर्तित नाम)ले भनिन्, मेरो छोराको कपाल सबै झर्यो। मेरो छोरा गाउँका कसैको अगाडि देखा पर्दैन।
