अलैँची उत्पादन र निर्यात दुवै घट्यो

अलैँचीको उत्पादन र निर्यात घटेको छ । भन्सार विभागकाअनुसार गत वर्षको पहिलो तीन महिनाको अवधिमा चालु आवको तीन महिनामा करिब ६३ करोड रुपियाँले कमी आएको छ । चालु आर्थिक वर्षको तीन महिनामा (साउन–असोज) एक अर्ब २६ करोड २१ लाख रुपियाँ बराबरको सात लाख ८३ हजार ७५) केजी अलैँची निर्यात भएको छ । जबकी गत वर्षको सो अवधिमा एक अर्ब ८० करोड ७६ लाख रुपियाँ बराबरको १५ लाख २५ हजार ९६० केजी निर्यात भएको थियो ।
अलैँची उत्पादक संघका अध्यक्ष निर्मल भट्टराईले जलवायु परिवर्तन, रोग, सिँचाइको कमी, दक्ष प्रावधिको कमीलगायतका अन्य कारणले अलैँची उत्पादन घटेको र त्यसको असर निर्यातमा परेको बताउनुभयो । गत वर्ष समयमा पानी परेन, समयमा पानी नपर्नाले पर्याप्त सिँचाइ भएन र फूल फुल्ने समयमा पानी नहुनाले यस वर्ष धेरै अलैँचीका बोट सुकेकाले उत्पादनमा कमी आएको उहाँको भनाइ छ ।
मूल्य भने सन्तोषजनक रहेको छ व्यवसायीका अनुसार तीन वर्षअघि छ सय रुपियाँ केजी अलैँचीको मूल्य रहेकोमा हाल प्रतिकेजी दुई हजार दुई सय पुगेको छ । अलैँचीको मूल्य पर्याप्त मात्रामा पाए पनि उत्पादन कमी हुँदा निर्यात बढ्न सकेको छैन ।
नेपालमा १८ हजार हेक्टरमा खेतीमा उत्पादन भइरहेको र वार्षिक पाँच हजार मेट्रिक देखि आठ हजार मेट्रिक टन उत्पादन हुने गरेको छ । व्यावसायिक ४३ जिल्लामा र खेती विस्तार ५३ जिल्लामा भएको छ ।
स्मरणरहोस् नेपालको पूर्वी जिल्लामा उत्पादन हुने अलैँची जर्मनी, भारत, इटाली, पाकिस्तान, अमेरिकालगायतका देशमा निर्यात हुन्छ । नेपाली अलैँची निकासी हुने ठुलो बजार भनेको भारत नै हो ।