५० प्रतिशत आप्रवासी कामदार रहेको अमेरिकामा कृषि कामदार अभाव हुने चिन्ता, नेपाली कति होलान् ?

संयुक्त राज्य अमेरिकाको इतिहासमै दोस्रो महिला कृषि मन्त्री बनेकी ब्रुक रोलिन्सले आफ्नो सम्पूर्ण ध्यान कृषि उद्योगको आर्थिक नोक्सानलाई रोक्न र बर्ड फ्लू लगायतका पशुजन्य रोगहरुका कारण किसानले भोग्नु परिरहेको चुनौतिलाई नियन्त्रण गर्न केन्द्रित हुने बताएकी छन् । ‘चुनाव अघि भाषण, चुनाव पछि काम’ भन्दै पहिलो दिनको काम शुरु गरेकी उनले पदवहाल गरेको दिन देखि नै आक्रामकरुपमा काम गर्न थालेकी छन ।
यसअघि पहिलो पटक राष्ट्रपति जर्ज डब्लु बुसको समयमा एन. भेनेमन सन् २००१ मा अमेरिकी इतिहासमै पहिलो पटक कृषि मन्त्री बनेकी थिइन ।
राष्ट्रपति ट्रम्पको पहिलो कार्यकालदेखि नै उनको सहयोगी रहेकी, थिङ्क ट्याङ्क अमेरिका फर्स्ट पोलिसी इन्स्टिच्युटका सीईओ रोलिन्समाथि ‘कृषि क्षेत्रभन्दा बाहिर’की भएको आरोप खेपिरहेकी रोलिन्सले अमेरिकी किसानले उत्पादन गरेको कृषि उपजलाई विश्वबजारमा पुर्याउन कृषि क्षेत्रको समग्र ढाँचामै परिवर्तन गर्ने र वृहत आधुनीकिकरण गर्ने घोषणा गरेकी छन् । त्यसको लागि अनावश्यक क्षेत्रमा खर्च कटौती र अमेरिकी किसानमा लगानी बढाउने उनको दावी छ ।
उनले पशुपंक्षीमा फैलिएका र भविश्यमा फैलन सक्ने रोगहरुको नियन्त्रण आफ्नो मुख्य सरोकार भएको बताएकी छन् । बर्ड फ्लु जस्ता रोगहरुबाट पोल्ट्री क्षेत्रका किसान रुनु नपर्ने, गाईपालक किसानहरुका समस्या समाधान गर्ने र समग्र ग्रामीण क्षेत्रका किसानको जीवनस्तर सुधार गर्ने उनको घोषणा छ । ‘हामी विश्वका कुरा गर्छाैं, तर आफ्ना किसानको अवस्था के छ भन्ने हेर्दैनौं । यो अवस्थाको अन्त्य हुनुपर्छ । मेरो कार्यकालमा ग्रामीण क्षेत्रका किसानले गर्व गर्ने अवस्था सृजना हुनेछ’ उनको भनाइ छ । ‘मेरो अन्तिम प्राथमिकता ग्रामीण समुदाय र कृषि उद्योगको दीर्घकालीन सफलता सुनिश्चित गर्नु हो, विस्तारित व्यापार बजारहरू मार्फत र किसानहरूको अर्को पुस्ताले फस्टाउन सक्छ भन्ने सुनिश्चित गर्नु हो । हामी बुझ्छौँ कि सबै अमेरिकी कृषि र सबै अमेरिकी जनताको सेवा गर्नु भनेको हाम्रो ग्रामीण समुदायहरू आज मात्र होइन, भोलिपल्ट र भोलिपल्ट समृद्धिका लागि सुसज्जित र समर्थित छन् भन्ने कुरा सुनिश्चित गर्नु होू, उनले भनिन् ।
राष्ट्रपति ट्रम्पको सबैभन्दा विवादास्पद योजनाका रुपमा हेरिएको आप्रवासन नीतिले अमेरिकाको कृषि क्षेत्रमा कामदार अभाव हुनसक्ने आंशकाबीच कृषि मन्त्री रोलिन्सले भने त्यो नीतिले दीर्घकालिनरुपमा कृषि क्षेत्रमा निकै ठूलो सकारात्मक परिणाम दिने दावी गरिन ।
श्रम बजारका विज्ञहरु र विभिन्न संचारमाध्यमहरुले आप्रवासीहरुको ठूलो हिस्सा कृषि क्षेत्रमा कार्यरत भएकोले उनीहरुको निस्कासनले अमेरिकी कृषि क्षेत्रमा कामदार अभावको समस्या गम्भिररुपमा उत्पन्न हुन सक्ने चेतावनी दिंदै आएका छन् । अमेरिकाको कृषि क्षेत्रमा झण्डै ५० प्रतिशत आप्रवासी विदेशी कामदारहरु रहेको कृषि मन्त्रालयले नै दावी गर्दै आएको छ । (हेर्नुहोस चार्टसहितको तस्विर)
तर, कति विदेशी कुन हैसियतमा कार्यरत छन् भन्ने बारेमा यकिन तथ्याँक भने नरहेको बताइएको छ । कतिपय नेपाली आप्रवासी पनि कृषि फार्महरुमा काम गरिरहेको बताइए पनि त्यसको यकिन अवस्था भने थाहा हुन सकेको छैन ।
नवनियुक्त कृषि मन्त्री रोलिन्सले भने आप्रवासीहरुलाई अमेरिकाबाट निस्कासित गर्दैमा कृषि क्षेत्रमा कामदार नहुने दावि गरेकी छन् । उनले सरोकारवालाहरुले त्यसबारेमा गरिरहेको चिन्ताको खण्डन गर्दै ट्रम्पको पहिलो कार्यकालमा भएको भन्दा धेरै गुना सहजरुपमा अब काम हुने र कृषि क्षेत्रका समस्याहरु समाधान हुने दावी गरिन् । उनको भनाइ छ—हाम्रा किसानहरू र हाम्रा पशुपालकहरूमा पर्ने सम्भावित विनाशकारी प्रभावलाई ट्रम्पले बुझ्दछन, कुनै पनि प्रकारको ट्यारिफ हाम्रा किसानहरू र पशुपालकहरूका लागि घातक छन् भने ती वन्द हुन्छन् ।