कृषि सामग्री संस्थानको गोदाममा अनुदानको मल भरिभराउ छ । तर स्थानीय किसान मल पाउन नसकेर छटपटाइरहेका छन् । मल हाल्न नपाएकै कारण तीन महिनाअघि लगाइएको मकै समय अनुसार सप्रिन पाएको छैन ।
यो दृश्य हो—बाराको । बाराको कलैयामा रहेको संस्थानको गोदाममा मल प्रयाप्त हुँदा पनि सरकारले नबाँडेपछि विचल्लीमा परेका किसान भारतबाट कमसल खालको मल ल्याएर हाल्न वाध्य छन् ।
सिम्रनगौढ नगरपालिका–८ का किसान कमलेशप्रसाद यादवका अनुसार मल नपाएपछि तीन महिनाअघि रोपेको मकै सप्रिन सकेको छैन । भारतबाट अवैध बाटो हुँदै ल्याएको मल कम गुणस्तरको र महँगो पर्छ । तर संस्थानले गोदाममा भरिभराउ रहेको मल समेत विक्री नगरेपछि किसान भारतीय बजारमा जान वाध्य रहेको उहाँको भनाइ छ ।
किसानलाई मल नदिएको कुरा संस्थानले पनि स्विकार गरेको छ । संस्थाने कलैया शाखाका प्रमुख रविकुमार केसरीका अनुसार अनुदानको मल लिनस्थानीय तहले सिफारिस पठाउनुपर्छ । मल लैजानका लागि पालिकाहरुलाई पत्राचार गरिए पनि सिफारिस नआउँदा किसानसम्म मल नपुगेको उहाँको भनाइ छ । बाराका १६ वटा पालिकाका २ सय ४६ सहकारी (बिक्रेता)लाई डिलर तोकेर मल वितरण गर्ने गरिएको छ ।
अहिलेको ‘लट’मा ६ सय ६७ टन (१३ हजार ३ सय ४० बोरा) डिएपी र ४ सय बोरा पोटास मल गोदाममा राखिएको छ । तर त्यो किसानले लैजान नपाउंदा गोदामै थन्किएको छ ।
सरकारी तथ्याँक अनुसार बारामा हिउँदको समयमा ६ हजार हेक्टरमा मकै खेती हुने गरेको छ ।
(लक्ष्मी साहले कान्तीपुरमा लेख्नु भएको समाचारमा आधारित)
