चालु आर्थिक वर्षको छ महिना अर्थात पुस मसान्तसम्म भएका ११ हजार ३३८ सडक दुर्घटना हुँदासडक दुर्घटनामा परेर एक हजार दुई सय ३३ जनाको निधन भएको छ । दुर्घटनामा परेकाहरु कुन पेशागत क्षेत्रका हुन् भन्ने नछुट्याइए पनि मृतकहरुमा अधिकाँश कृषि क्षेत्रका व्यक्तिहरु रहेको सुरक्षा निकाय स्रोतको भनाई छ ।
गृह मन्त्रालयका अनुसार विसं २०८० को पुस मसान्तसम्म देशभर १२ हजार आठ सय ५६ सडक दुर्घटनामा एक हजार एक सय ४९ जनाको ज्यान गएको थियो । यस वर्षको एक हजार दुई सय ३३ जनाको ज्यान गएको छ ।
मन्त्रालयका अनुसार गत साउनमा एक हजार छ सय २८ सडक दुर्घटनामा एक सय ५२, भदौमा एक हजार छ सय १९ दुर्घटनामा एक सय ७४ जनाको अकालमा ज्यान गएको थियो । गत असोजमा एक हजार आठ सय ७३ सडक दुर्घटनामा दुई सय, कात्तिकमा एक हजार नौ सय २८ दुर्घटनामा परी दुई सय ५८ जनाको निधन भएको विवरण छ । अघिल्लो गत मङ्सिरमा दुई हजार १४ सडक दुर्घटनामा परी दुई सय ५२ र पुसमा सबैभन्दा बढी दुई हजार दुई सय ७६ दुर्घटनामा परेर एक सय ९७ जनाको निधन भएको छ ।
विवरण अनुसार गण्डकी, काठमाडौँ उपत्यका र कर्णालीमा दुर्घटनाको सङ्ख्या घटे पनि मृत्यु हुनेको सङ्ख्यामा बढोत्तरी भएको छ । मधेस प्रदेश र बागमती काठमाडौँ उपत्यको बाहेकमा दुर्घटनाको सङ्ख्या बढे पनि मृत्यु हुनेको सङ्ख्या घटेको छ ।
