मकवानपुर प्रहरीको हेटौँडा–१५ मा रहेको रातोमाटे प्रहरी पोष्टले अवैध ढंगबाट तस्करको लागि ल्याइएको गोरु बोकेको ट्रकलाई स्कर्टिङ गरेर नाका कटाइदिएको घटना बाहिरिएको छ । घटना आइतबार साँझको हो ।
पशु सेवा कार्यालय हेटौँडालाई चितवनबाट मकवानपुर हुँदै झापा तर्फ अवैध ढंगबाट तस्करीको लागि गोरु लगिँदै छ भन्ने सूचना प्राप्त हुन्छ । उक्त सूचना बमोजिम पशु सेवा कार्यालयले एउटा टोली हेटौँडा र मधेश प्रदेशको नाकाको रूपमा रहेको हेटौँडा–१५ स्थित रातोमाटे नाकामा नजिकै आफ्ना केहि कर्मचारीलाई तैनाथ गर्दछन् ।
सूचना बमोजिम २५ वटा गोरु रहेको बाप्र ३–००१ ख १४२४ नम्बरको ट्रक आएको थाहा पाएपछि कार्यालय प्रमुख समेत रहेका ब्रजकिशोर ठाकुर अर्को बाटो भएर मोटर साइकलमा रातोमाटे पुग्छन् । उनी पुग्दा प्रहरीले ट्रकलाई रोकेर केहि सोधखोज गरिरहेको हुन्छन् । सोही समयमा ठाकुरले प्रहरीलाई उक्त गोरुको तस्करी हुन लागेको र यो ट्रकलाई पशु सेवा कार्यालयको जिम्मामा छाडन त्यहाँ कार्यरत प्रहरीलाई भन्छन् ।
ठाकुरले रातोमाटे प्रहरी चौकी इन्चार्ज कुमार फुयाँलसहित जिल्ला प्रहरी कार्यालय मकवानपुरका प्रमुख प्रहरी उपरीक्षक विश्वराज खड्कालाई ट्रकबारे जारकारी दिँदै सहयोगको लागि अनुरोध गर्दागर्दै प्रहरीले ट्रकलाई छाडिदिन्छ र त्यहाँबाट ट्रक पथलैयातर्फ कुद्छ ।
आफ्नै अगाडी तस्करी हुन लागेको गोरुको ट्रक कुदेपछि उनले पथलैयामा सम्पर्क गरी आफू पनि उक्त ट्रकको पिछा गर्छन् र पथलैया प्रहरीको सहयोगमा उक्त ट्रक रोकिन्छ ।
ठाकुरको आग्रहलाई बेवास्ता गर्दै प्रहरीले ट्रकलाई छाड्ने तयारी गर्दछ । ठाकुरसँग चेकपोष्टको भित्र कक्षमा कुराकानी गरिरहँदा बाहिर ट्रक एकाएक कुद्छ ।
अवैध सामग्री तथा तस्करी रोक्न तैनाथ प्रहरीलेले अवैध ढंगबाट झापा हुँदै बंगालादेश तथा भुटान निर्यात गर्न लागिएको २५ वटा गोरु भएको ट्रकलाई नियन्त्रण लिन ।अनुरोध गर्दागर्दै समेत बाइकमा स्कर्टिङ गरेर नाका कटाइदिए,पछि ठाकुरले पत्रकार सम्मेलनको आयोजना गरी प्रशासनको असहयोगको घटना सार्वजनिक गरेका हुन् ।
जनपथ प्रहरी र प्रशासनबाट सहयोग नपाएका प्रमुख ठाकुरले सशस्त्रको सहयोग लिएर सशस्त्र प्रहरी १४ नम्बर हेडक्वार्टरका प्रमुख प्रहरी उपरीक्षक सन्तोषविक्रम शाहसँगको समन्वयमा पथलैयास्थित राजस्व अनुसन्धानमा खटिएको सशस्त्र प्रहरीले ट्रकलाई नियन्त्रणमा लिनुपरेको दुखदायी कुरा भएको उनको भनाई छ ।
राजस्व अनुसन्धान कार्यालय पथलैयाका सशस्त्र प्रहरीका प्रहरी निरीक्षकको टोलीले ट्रकलाई नियन्त्रणमा लिएर पशु सेवा कार्यालय हेटौँडालाई जिम्मा लगाएको उनले बताए । सशस्त्रको सहयोगमा ट्रक नियन्त्रणमा लिए लगत्तै ट्रकका चालक र गोरु चरुवाहरू फरार भएपछि हेटौँडाबाट अर्को चालक बोलाएर ट्रकलाई हेटौँडा ल्याइएको उनको भनाई रहेको छ ।
नियन्त्रणमा लिइएको ट्रकमा तनहुँका भीम राईले लक्ष्मी चौपाया सप्लायर्स मार्फत झापा लाने भनेर गलत भेटेनरी प्रमाणपत्र भेटिएको कार्यालयले जनाएको छ । भेटेरेनरी प्रमाणपत्रमा आँबुखैरेनी, तनहुँका भीम राईले लक्ष्मी चौपाया सप्लायर्समार्फत झापाको हेमादेवी सप्लायर्सलाई उक्त गोरु बिक्री गरेको देखिन्छ । सो कार्यका लागि डा। टीकाराम न्यौपानेले भेटेरेनरी प्रमाणपत्र जारी गरेका छन् ।
प्रतिगोटा ५ हजार रुपैयाँको खरिद बिल बनाएर लक्ष्मी चौपाया सप्लायर्स, मकवानपुर– १६ हेटौँडाको नाममा बिजक जारी गरिएको कागजात तयार गरेर गोरु तस्कर गर्न लागिएको पाइएको कार्यालयले जनाएको छ ।
ट्रकले हेटौँडा उपमहानगरपालिकाको पशुहाट सेवा शुल्कबापत २५ गोरुका लागि तीन हजार रुपैयाँ बुझाएको छ जबकि हेटौँडा उपमहानगरपालिकाले प्रति गोरु २ सय राजश्व उठाउने गरेको छ । यी सबै तथ्य प्रमाण हेर्दा र चालक तथा चरुवा फरार हुनुले गोरुलाई तस्करीको लागि लैजान लागेको प्रमाणित भएको उनको भनाई छ ।
के भन्छ प्रहरी ?
नेपाल प्रेसले यस घटनाबारे मकवानपुरका प्रहरी प्रमुख विश्वराज खड्कासँग प्रतिक्रिया लिँदा उनले आफूलाई पशु सेवा कार्यालयका प्रमुख ठाकुरले फोन गरेर सहयोगको लागि अनुरोध गरेको स्विकारे ।
उनले भने “मलाई ठाकुर जी ले फोन गर्नुभएको थियो, उहाँको फोन आएपछि मैले तत्काल त्यहाँको प्रहरी इन्चार्जलाई सो कुरा जानकारी गराएर समन्वय गर्नको लागि भनेको थिए, तर उनीहरू पनि अरू घटनामा बिजी भएको कारण ट्रक भागेछ, म यो विषयमा चौकीका इन्चार्ज तथा सोही समयमा खटेका प्रहरीसँग सोधखोज गरिरहेको छु ।”
नेपाल प्रेसबाट
