तिहार, तिरगाउँका तिरुवा र तस्बिरको भाषा

बैतडीको दशरथ चन्द नगरपालिका–४, तिरगाउँमा मंगलबार रुवावासी चल्यो । कारण थियो—२२ वर्षिय हरिस तिरुवा चार कोठको घरमा ताला लगाएर बालबच्चासहित भारत हिँडे र उनीसंगै गाउँका दीपक तिरुवा, महेश तिरुवासहित एकैचोटि ३० जना युवा परिवारसहित भारत हिँडे । स्थानीय प्रेम तिरुवाका अनुसार रोजगारीका लागि भारत पलायन हुने परिवारलाई लिन मङ्गलबार दुई वटा हायस गाडी गाउँमा देख्नासाथ गाउँले रुन थालेका थिए । तिहारको मुखमा युवाहरु लर्काे लाएर भारत हिँडपछि गाउँ सुनसान हुने नै भयो, गाउँलेहरु रुने नै भए ।
स्वदेशमा गरिखान पर्याप्त जग्गा जमिन नभएको र ज्यामी काम नपाउँदा छोरा भारत पलायन भएको मदन तिरुवाले पीडा सुनाउनुभयो ।
भनिरहनु नपर्ला संख्या फरक हुनसक्ला, ठाउँ फरक हुनसक्ला, तर यो दृश्य केवल तिरगाउँको मात्र होइन, देशका सबै गाउँ—ठाउँको हो । अरु देशतिर युवाहरु चाडपर्व मनाउन विदेशबाट देश फर्किन्छन्, हाम्रोमा विदेशिन बाध्य हुन्छन् । यस्तो विषयमा सोच्ने कस्ले ? त्यो काम देशैभरिका सरकारहरु र प्रशासनको उच्च तहमा बसेकाहरुको होइन ? तर, तिनीहरुले यसबारेमा सोच्न किन सक्दैनन् ? आजको दिनमा यो प्रश्नको जवाफ कसैसंग नहोला कि नहोला ?
(गोकर्ण दयालले गोरखापत्रमा लेख्नुभएको समाचारमा आधारित रहेर तयार गरिएको सामाग्रि । तस्बिर पनि गोकर्ण दयालकै हो)